Wi snackt platt Folgen

Ok dütmal hebbt wi bi "Wi snackt Platt" wedder ünnerscheedlich Themen för Jo: - Nick Wilder un de Karl-May-Spelen in Bad Segeberg Düt Wekenenn geiht de Saison bi de Karl-May-Spelen in Bad Segebarg toenn. Düt Johr ok mit dorbi weer de Schauspeler Nick Wilder. He weer in en Hauptrull beleven un hett den Halunken Emery Foster speelt. Wi hebbt mit Nick Wilder över siene Tiet bi de Karl-May-Spelen snackt. Twüschen twee Vörstellen. In'n Peerstall. - Quickborn-Pries, Quickborn-Verlag un Quickborn-Vereenigen Al in’e verleden Utgaav hebbt wi vermellt: Gesche un Peer-Marten Scheller vun’n Hamborger Quickborn-Verlag sünd mit den renommeerten Quickborn-Pries vun`e Hamborger Quickborn-Vereenigen för nedderdüütsche Spraak un Literatur uttekent worrn. Dütmal vertellt wi Jo noch en beten wat mehr doröver - un wi stellt de Fraag: wat hett egens de Quickborn-Verlag mit de Quickborn-Vereenigen to doon? De Antwoort vörweg: Hüüttodaags sünd dat twee ünnerscheedlich Institutschonen. Man: se hebbt en gemeensame Geschicht! - De Salt-Ewer "De Sulte" in Lümborg "De Sulte" so heet de Originaal-Nabo vun en olen Salt-Ewer, mit den een op de Ilmau in Lümborg (Lüneburg) Utfohrten maken kann. Bi "Wi snackt Platt" vertellt wi Jo mehr över dat Schipp un de Ehrenamtlichen, de sik üm dat Schipp kümmern doot. - "Finkwarder blifft Finkwarder" - en plattdüütsche Radio-Reportaag ut dat Johr 1957 De Kollegen ut de NDR Retro-Redakschoon hebbt in't NDR Archiv en plattdüütsche Radio-Reportaag ut dat Johr 1958 wedderfunnen, de en sik nu op ndr.de/platt anhöörn kann: "Finkwarder blifft Finkwarder" heet düsse Reportaag vun Wolfgang Christian Seiffert un Otto Tenne und dat geiht dor üm de Geschicht vun Finkwarder un woans ut dat fröhere Fischerdörp en Industrievöroort worrn is. Vele Lüüd, de in'e 50er Johrn op de Elvinsel tohuus weern, kaamt in düsse Reportaag to Woort. Bi "Wi snackt Platt" maakt wi Jo en beten wat Lust op düsse würklich heel interessante Reportaag vun domals. Moderatschoon: Jan Wulf

Bi "Wi snackt Platt" vertellt wi dütmal mehr över dat ne’e Stück "Barfoot in'n Park" in’t Ohnsorg-Theater. Dorto geiht dat ok noch üm dat ne’e Live-Album vun’e Sängersch Norma, wi sünd in Sülldörp to Besöök, wo en sik bi Buer Timmermann en so nöömten Saisongoorn meden kann, un dat geiht üm dat Verleger Ehpoor Gesche un Peer-Marten Scheller – de twee sünd de ne'en Priesdrägers vun den renommeerten Quickborn-Pries vun’e Hamborger Quickborn-Vereenigen. Moderatschoon: Jan Wulf

Bi "Wi snackt Platt" geiht dat dütmal veel wat üm Snacks op Platt, de ok de Hoochdüütschen kennen un bruken doot. Woso seggt wi egens sowat as "nu is Daddeldu" oder "Foffteihn maken"? Wat stickt achter düsse Snacks, wo kaamt de her? De Antwoort dorop gifft dat düssen Sünndag bi "Wi snackt Platt" to hören. Ketelklopper-Platt Un denn vertellt wi Jo bavento ok noch, wat dat Ketelklopper-Platt is, wo dat herkummt un wat dat dormit op sik hett. Henning Voscherau, een vun uns vörmalige Börgermeesters, hett dor fröher ok al mal in en Börgerschopsitten vun vertellt hatt. Mehr dorto gifft dat Sünndagmorgen op'e Ohren halvig negen bi NDR 90,3. Moderatschoon: Jürgen Fitschen De Leder in uns Sennen: Ove Thomsen - Regen in'n Kopp Charmonia - Help Wiebke Colmorgen & Hardy Kayser - Maak ik morgen Ina Müller - Dörp Reggae Nick, Yared & Floy feat. The Charchullas - These boys must be free