Wi snackt platt Folgen

Dütmal geiht dat bi "Wi snackt Platt" üm en echten plattdüütschen Literatur-Megastar! In ganz Düütschland hebbt se domals in’t negenteihnste Johrhunnert de Böker vun Fritz Reuter leest. Un dat nich op Hoochdüütsch, sünner op Platt. Mehr över un vun Fritz Reuter is in düsse Utgaav vun "Wi snackt Platt" to höörn, denn dat is düsse Daag nu 150 Johr her, dat de Begrünner vun’e ne’e plattdüütsche Literatur storven is. Dorto gifft dat denn ok noch twee Geschichten vun den Plattdüütschen Vörleeswettstriet "Jungs und Deerns leest Platt" to höörn. De Geschicht "Hoor snieden", de Emma Alma Hausschild vun‘e Grundschool Arp-Schnitger-Stieg in Nefell vördragen hett un dat Märken "De Prinzessin op'e Arft" , vörleest vun Amelia Blank vun dat Immanuel-Kant-Gymnasium in Marmsdörp. Moderatschoon: Jan Wulf

Dütmal sünd wi in'n Wildpark Eekholt to Besöök, wo een an'n Sünnavend, den 13. Juli mal wedder en Törn op Platt mitmaken kann, dorto maakt wi ok noch Lust op dat Festival op Platt in Elmshorn (Sünndag, den 7. Juli, avends Klock 6 geiht dat los) un Ji höört de Geschicht, mit de de Abiturientin Sophie Fick vun’t Friedrich-Ebert-Gymnasium in Heimfeld verleden Sünndag den eersten Pries bi den Plattdüütschen Leeswettstriet Jungs un Deerns leest Platt wunnen hett. Moderatschoon: Jan Wulf

„Jungs un Deerns leest Platt“ – so heet de plattdüütsche Leeswettstriet vun’e Hamborger Scholen. Verleden Sünndag, dor weer dat grote Finale in’t Ohnsorg-Theater – un dree vun de Geschichten, mit de de Schölerinnen un Schölers bi „Jungs un Deerns leest Platt“ wunnen hebbt, de schüllt Ji in düsse Utgaav vun "Wi snackt Platt" höörn: De Geschicht "Allens kloor, Papa" vun Hans Wilkens, mit de Erich Graudus ut de veerte Klass vun’e School Arp-Schnittger-Stieg in Nefell den eersten Pries in'e Kategorie vun'e 3. un 4. Klassen wunnen hett. Dorto de Geschicht "Voß un Wulf bi't Fischen" vun Wilhelm Wisser, vördragen vun Jana Diercks ut de 6. Klass vun't Gymnasium op Finkwarder - un de Geschicht "Sneewittchen un de söven Öllern" vun A. Sonne, mit de Sissi Dunkel ut 9. Klass vun't Friedrich Ebert-Gmynasium in Heimfeld den eersten Pries in'e Kategorie vun'e 7. bet 9. Klassen wunnen hett. Gedenken an Kurt Wagner Bavento dinkt wi in düsse Utgaag ok noch an een ganz besünnern Mann ut Finkwarder. Al an’n 15. Juni is Kurt Wagner in’t Öller vun 89 Johr storven – un dat geev woll keen annern Mann, de so goot över de Geschicht vun Finkwarder Bescheed wuss as he. Dörteihn Böker hett he över Finkwarder schreven un ok wi vun’n NDR weern faken för Interviews bi em to Besöök un hebbt uns wat över de Historie vun Finkwarder vertellen laten un dat – op Hooch un Platt. Wichtig weer Kurt Wagner aver ok för de Kultur un de Vereenen op Finkwarder. 1990 weer he een vun de Lüüd, de den Kulturkrink op Finkwarder in’t Leven ropen hebbt, vele Johrn weer he Vörsitter vun den Vereen – un ok Finkwarder Kunstpries weer mit een vun seine Ideen. Un wat för en Bedüden he för Finkwarder harr, dat süht en ok doran, woveele Institutschonen nu Andeel nehmt an sein Doot – vun’n Drachten- un Heimatmuseum, över de Finkwarder Speel, de Freewillige Füerwehr, de Heimatvereen bet hen ton Sportvereen op Finkwarder un vele, vele mehr. Düsse Mann hett veel doon för Finkwarder un: he warrt fehlen. Moderatschoon: Jan Wulf